قصه من الواقع
تبتدى الحكاية برنة تليفون من حد من صحابك العزاب بيقولك انه عايز يشوفك هو و العيال و ان انت بايعهم جامد مع تحبيشة محترمة من الشتايم الغير محترمة فتقوله قشطة بدل ما يكمل شتيمة و عشان انت فعلا وحشاك قعدة القهوة.
و بعد كده يبتدى مخك يودى و يجيب.. ازاى مراتك توافق انك تروح القهوة من غير ما تقفش خصوصا انك بقالك كام يوم بترجع من الشغل متأخر و مش شايف فبتاكل و تتقلب تنام زي ال---
من خلال خبرتى انا و مجموعة من المتجوزين حديثا زى حالاتى ينصح بالاتى على الترتيب ( من افضل الحلول الى اسوأها )
1- طريقة ما تخلى صحابك ينورونا : و دى بتخلى مراتك تعزم صحابها عندكوا فى البيت و ميزة الطريقة دى ان مراتك حتتبسط انها مش حتعمل غدا و حتشوف صحابها و كمان انت مش حتوصلها ولا تاخدها من اى حتة
2- طريقة زى زيك : يعنى هى كمان تنزل تشوف صحابها بس عيب الطريقة دى انك حتكع عشان هى من حتروح قهوة حقيرة زيك .. لأ دى حتروح حاجة ألاجا و تبقى لبست لو حتوصلها عشان مش حتعرف تقعد براحتك و كمان مش حتوصلها هى بس ده انت حاتوصلها هي وصاحباتها واحدة واحدة.
3- طريقة ارشينى تلاقينى : كيسة شوكلاتات محترمة على وعد بسيما الخميس الى جاى و طبعا عيوبها واضحة
4- طريقة انا راجل اوى : تقفش انك نازل نازل وان انت ما شفتش صحابك بقالك كتير و الطريقة دى حتخرج بيها و مش حتدفع حاجة بس ايه.. قابل الطين عليك و على صحابك و على اللي جابوكوا جميعاً نفر نفر.

اللي ينفع معاك من القائمة دي يا ريت تشيره مع اخواتك الغلابة عشان القهاوي فلست واقتصاد البلد مش مستحمل